Младите ракометари на Фруитленд Борец, ја забележаа и третата победа во кадетската ракометна лига. На гостувањето во Штип тие го совладаа составот на Текстилец со резултат 29:35, и останаа со максимален учинок.
Велешани уште од старт поведоа и не го испуштија водството до крајот на натпреварот. Домашниот состав парираше само до резултат 3:3, а од тој момент кадетите на Фруитленд Борец почнаа резултатски да се одлепуваат. На полувреме се замина со плус 5 за Фруитленд Борец 20:15; а кон средината на вториот дел предноста се искачи и на плус 10, 25:15, но до крајот на натпреварот домашниот состав го ублажи поразот.
Најефикасни кај Фруитленд Борец беа Давид Стојановски и Борјан Вељановски со по седум постигнати погодоци. Кај Текстилец Мартин Стефанов беше единствена светла точка со девет постигнати погодоци. Во наредното коло Фруитленд Борец го пречекува составот на МРК Куманово.
